Contrat de mariage Ratat-Gerard

Trouvé à Tonnerre, AH (archives de l’hôpital), E 134 (17 novembre 1560)

« Furent presens en leurs personnes Jehan Ratat practicien à Tonnerre, jouissant de ses droicts, accompagné de honneste femme Nicole Jaquin sa mère et Catherine Ratat sa seur et damoisselle Jaqueline de Perseval dame de Bernol d’une part / et honnorable homme Pierre Gerard commissaire à faire venir les deniers de la recepte de l’election de Tonnerre, pere et tuteur de Nicole Gerard sa fille de luy autorisé aussi présents accompagnés de honnorable femme Jaqueline Cerveau et maistre Jehan Gerard prebtre chanoine de tonnerre d’aultre part / lesquelles parties ont faict les accordz de mariage suyvans / A scavoir que lesdictz Ratat et lad. Nicole prendront l’ung l’aultre par foy et loyauté de mariage selon la loy de dieu et nostre mere saincte eglise /
Et ledict mariage consommé donnera ledict Gerard à sadicte fille partage de tous les biens à elle eschuz et advenuz avec ses freres et seurs et qui luy apartiennent à cause des successions de sa feu mère, Estienne et Pierre Carrey ses oncles et de Marguerite vefve de feu Jehan Carrey sa grand mère, selon et ensuyvant les partages faictz desdictz successions avec ledict Gerard et aultres heritiers omologuez par justice et traicté de norriture faict avec ledict Gerard pour le regard de sesdictz enfans / Et pour les biens et revenuz des fruits desdictz successions que led. Gerard a levez et receuz ou deu lever et recevoir pour la portion de sadicte fille pendant le temps desdicts successions et jusques à huy / pour les bons et agreables services que sadicte fille lui avoit faictz durant quatre annees que son temps de nourriture est expiré et aussi pour demeurer quicte envers elle de la somme de seize livres treize sols sept deniers faisant sa portion de la somme de quatre vingtz trois livres huict sols deue à sesdicts enfans par le partage faict des biens de la succession de leur feue mere que ledict Gerard a receu et la somme de dix livres tz faisant sa portion de la somme de cinquante livres tz deue par ledict Gerard à sesdictz enfans pour les causes contenues audict partage et traicté de norriture faict pour raison de sesdictz enfans / Et de la somme de neuf livres tz pour la portion de quarante cinq livres tz pour la prisee et estimation des meubles advenuz à sesdicts enfans pour le partage faict des biens de la succession de ladicte Marguerite vefve dud. Carrey, lesquelz biens ledict Gerard a pris et venduz, led. Gerard a promis et sera tenu payer la somme de cinquante escuz sol ou bien rendra compte des levees et fruicts desdictz successions comme tuteur à l’option dudict Ratat // Et oultre tout ce que dessus ledict Gerard a promis donner à sadicte fille en avancement de mariage pareille somme de cinquante escuz solz, et de la vestir et habiller bien et honnestement selon son estat et lieu dont elle est issue, luy bailler son trosseau à scavoir : ung lict garny de six custodes [ridaux] couverte [couverture] et dix draps, seront et demeureront ungs et commungs suyvant la coustume du baillage de Sens / Et oultre en biens propres pourveu toutesfoys qu’ilz ayent vivant dudict mariage lors du premier morant prandra le dernier survivant avant partage tous ses habitz, bagues et joyauz avec son lict garny comme dict est / Sera et demeurera ladicte Nicole doué de douaire prefix de la somme de cinquantes escuz sol ou bien de douaire constitué à son choix / Et sera tenu ledict Ratat l’enjoiller et luy donner bagues et joyauz jusques à la somme de quinze escuz sol / Car ainsi promettant, obligeant, renonceant faict et passé audict Tonnerre en presence de discrette personne messire Jehan Gerard prebtre chanoine dudict Tonnerre et Emon Du Ban vigneron demeurant à Espineul tesmoings, ce xbiie novembre an cinq cens soixante. Signé Moreau (notaire)
(à la suite car il s’agit d’une copie du 12 mars 1582 :)
Le xxe jour du moys d’avril mil cinq cens soixante et ung en presence de moy notaire tesmoings soubz escriptz, ledict Ratat en personne a receu manuellement et comptant dudict Gerard la somme de cent escuz d’or sol pour les causes contenues de l’aultre part après qu’il a dict et declaré avoir entre ses mains les partages des successions dudict contract, iceulx avoir leuz et veuz, et laquelle somme de C escuz il s’est tenu pour bien contant et en a quicté et quicte ledict Gerard pour les causes contenues audict contract / En presence de honnorable homme Guyon Puissant sergent royal en l’election de Tonnerre et Estienne Serain procureur demeurans audict Tonnerre tesmoings.
Signé Moreau. Et en marge est escript ledict contract et quictances sont signetz desdictes partyes.
(en dessous d’une autre main :) Pour coppie suyvant l’appointement du xii mars mil bc iiiixxii [pour] le Me, les religieulx de l’hospital et la Vve Me Jehan Ratat. Signé P. Petitjehan (notaire). »

 


Sur Jehan Ratat, vous pouvez également découvrir sur ce blog :

 


2015 © Tonnerre Histoire. Tous droits réservés pour tous pays.